શહેરના સમા-સાવલી રોડ ઉપર સમા કેનાલમાં ગત મોડી સાંજે નાહવા પડેલા બે કિશોરો ડૂબી જતા લાપતા થયા હતા. લાપતા બે કિશોરો પૈકી એક કિશોરનો મૃતદેહ આજે 10 કિલો મીટર દૂર સેવાસી પાસેથી કેનાલમાંથી મળી આવ્યો હતો. બંને કિશોરોના કપડાં અને સાઇકલ કેનાલ ઉપરથી મળી આવ્યા બાદ તેઓની શોધખોળ શરૂ કરવામાં આવી હતી.
સમગ્ર મામલે પ્રાપ્ત વિગતો અનુસાર, શહેરના સમા વિસ્તારમાં આવેલ 17, સત્યમનગરમાં રહેતો ઓમ મનોજભાઇ શિંદે (ઉં.વ. 15) અને 6, સત્યનારાયણ સોસાયટીમાં રહેતો મયુર દલવી (ઉં.વ. 13) મોડી સાંજે સાઇકલ લઇને સમા મેકડોનાલ્ડ હોટલ પાસે નાહવા ગયા હતા. કેનાલ ઉપર સાઇકલ અને કપડાં મૂકી કેનાલમાં નાહવા પડેલા આ બંને મિત્રો કેનાલના પાણીમાં તણાઇ જતા લાપતા થયા હતા.
સુત્રોના જણાવ્યા અનુસાર, ધોરણ-6 માં અભ્યાસ કરતો મયુર દલવી અને ઓમ શિંદે મોડી સાંજ સુધી ઘરે પરત ન ફરતા પરિવારજનો દ્વારા શોધખોળ કરવામાં આવી હતી. શોધખોળ દરમિયાન બંનેના કપડાં અને સાઇકલ કેનાલ ઉપરથી મળી આવ્યા હતા. બંને કિશોરો કેનાલમાં ડૂબી ગયા હોવાના અનુમાન સાથે બનાવની જાણ પોલીસને કરવામાં આવી હતી. સમા પોલીસ મથકનો પોલીસ સ્ટાફ તુરતજ સ્થળ પર દોડી આવી હતી. અને ફાયર બ્રિગેડની મદદ લઇ તપાસ શરૂ કરાવી હતી. જોકે, રાત્રે 3 વાગ્યા સુધી શોધખોળ કરવા છતાં, પત્તો મળ્યો ન હતો.
શોધખોળ દરમિયાન આજે વહેલી સવારથી કેનાલના વહેતા પાણીમાં લાપતા થયેલા મયુર દલવી અને ઓમ શિંદેની શોધખોળ શરૂ કરવામાં આવી હતી. કલાકોની શોધખોળ બાદ ફાયર બ્રિગેડના લાશ્કરોને સમાથી 10 કિલો મીટર દૂર સેવાસી કેનાલમાંથી મયુર દલવીનો મૃતદેહ મળી આવ્યો હતો. ફાયર બ્રિગેડે કેનાલમાંથી મૃતદેહ બહાર કાઢી પોલીસના સોંપ્યો હતો. અને બીજો લાપતા ઓમ શિંદેની શોધખોળ શરૂ કરી હતી.